重點推介本地長篇小說佳品:歐子爭《九域爭霸》⋯⋯包羅萬象,欲罷不能

各位好!今次暖島推文將會重點推介一部近年佳作,就係《九域爭霸》!作者係本人好欣賞的『歐子爭』。本文並非業配,旨在推廣本地網絡文學佳作,覺得好睇就介紹你睇,咁簡單!(本文筆者:阿暖)

已經想試睇的朋友可即時點連結進入,我呢篇廢話可以唔睇;如果你仲想知多啲先決定追唔追,就繼續睇落去啦!

連載點:《紙言》(作者本人親自發表,全文免費)

連載點:《Penana》(作者本人親自發表,全文免費)

《九域爭霸》官方簡介:

江河的父母因沉醉於名為「九域爭霸Online」的實感線上遊戲而變成植物人,他深信父母只是被困在遊戲世界中,為了查出父母的下落,他決定進入九域爭霸Online……

由於我目的都係想大家睇子爭本書,所以呢篇推介文就無謂廢話,重點有五個:

  • 『網遊類』入門必睇:
    • 咩係『網遊小說』呢?即係個故事主角冒險的地方,好多時係一個『超實感的未來網絡遊戲』,即係可以打怪升呢,有各種數值參考咁樣,就好似真實打緊機。以香港小說嚟講呢個題材係好少見,而《九域爭霸》就係其中一個水準達到專業水平的先行者,即係話,想睇網遊小說,第一本就應該揀九域爭霸(又或者楓城的《遊戲之道》,之前有介紹過。)《九域》的內容穩打穩扎,即使第一次睇網遊類,都能輕鬆掌握唔會一頭霧水,呢個係筆者最欣賞的一個地方。

  • 同時佢亦超越左網遊小說:
    • 《九域》表現係講主角喺一個網遊世界裏面爭霸的過程,但實則上,背後原來牽涉到關於現實世界的一連串大陰謀佈局!當中牽涉到好多神秘組織同強者,佢地唔只參與緊《九域》的遊戲世界,而是喺其他世界都同一啲惡勢力周旋緊!而呢個牽涉到的大佈局,就係作者歐子爭一系列長篇小說將會逐一揭露的。可以話,《九域》只係呢個更大的『先生系列』的開門作品!好多人睇完《九域》就被『先生系列』所著迷,跟住追落去同系列的作品,成為歐子爭的死忠⋯⋯佢嘅魅力就在於世界觀壯闊,而且系列故事之間的伏線都係通的,一路睇一路揭露個大真相⋯⋯

  • 角色塑造吸引貼地:
    • 筆者個人認為《九域》是專門打造俾香港人睇,不管主角性格,女主角外型個性設定,以至世界格局,都好得香港人共鳴。尤其個人幾欣賞子爭塑造的『MK妹』女主。

  • 各種異能設定包羅萬象:
    • 呢個一定要讚《九域》世界裏面嗰九個『域』的設定:呢九個域包括『佛國域、科技域、魔法域、武林域、修真域、無間域、幽冥域、異能域、役使域』,睇落每個『域』就好似一個不同的小說題材咁,而子爭喺《九域》裏面竟然好有心思咁將九種修煉系統同世界觀都架設好哂!哇!睇完《九域》好似睇左好幾本小說咁豐富。所以我亦強烈推舉《九域》係香港長篇幻想類小說的『入門作』,新睇書的讀者睇完《九域》,會對時下好幾種主流網絡小說都有咗基本認識!

  • 主角光環大快人心:
    • 其實筆者覺得呢點最重要,睇文就係要睇爽快、開心、熱血!《九域》絕對唔會係睇到你壓抑的小說,返工有壓力?返學有壓力?入去《九域》放鬆吓啦!

連載點:《紙言》(作者歐子爭本人親自發表,全文免費)

連載點:《Penana》(作者歐子爭本人親自發表,全文免費)

最後利申:

本人睇哂全文,買咗作者簽名本的《九域爭霸》,亦做咗佢嘅訂閱戶,有圖為證。


其他推介: